Nga Bannakyaggwe bakyakungubagira abawagizi ba ttiimu y’omupiira ey’essaza ababiri abafiira mu kabenje akaagwa ku Ssande e Butambala, ate omu ku babadde ku bitanda nga bataawa afudde.
Afudde ye Mulwana abasinga gwe babadde bamanyi nga Musiraamu ng’ono abadde avuga bodaboda ku siteegi ya Sombe mu kibuga Mukono wakati.
Abawagizi abasooka okufa ku Ssande kuliko Swaibu Ssemakula ng’ono yali akulira ba bbaawunsa mu kibuga ky’e Mukono ne Richard Luboyera. Abawagizi bano baali bava ku mupiira gw’essaza ly’e Kyaggwe ne Gomba nga guno Kyaggwe yagugobera ku bugenyi ku ggoolo bbiri ku bwereere.
Okusinziira ku mwami wa Kabaka atwala essaza ly’e Kyaggwe, Ssekiboobo Vincent Matovu, yategeeza nti abawagizi nga 16 be baalumizibwa nga bano baasooka kutwalibwa mu ddwaliro e Gomba gye baafunira obujjanjabi obusooka ng’oluvannyuma abamu baasiibulwa ate abasigadde ne bongerwayo mu malwaliro amalala omuli Mulago n’ery’amagye e Bombo.
Essaza ly’e Kyaggwe era lyatandika enteekateeka y’okukungaanya ensimbi z’okujjanjaba abawagizi abali mu malwaliro ag’enjawulo ng’abasinga amagumba gaamenyeka bya nsusso era obulumi bwe balimu bwa maanyi.
Mu bamu ku bakyali mu bulumi obw’ensusso ye munnamawulire Baker Lumu ng’ono yamenyeka mu kiwato, omukono n’okugulu.
Ttakisi ekika kya drone nnamba UBK 432M y’egambibwa okulemerera omugoba waayo ne yeefuula emirundi ng’esatu olwo abawagizi okwali n’abaali batudde waggulu ku katanda ne batandika okuwandagala n’abamu n’ebagoya.
Essaza ly’e Kyaggwe liddamu okusamba emipiira gy’amasaza ku Ssande ng’ekyaza Mawogola ku kisaawe kya Bishop S.S.
Related
Let others know by sharing
https://kyaggwetv.com/omuwagizi-wessaza-lye-kyaggwe-omulala-afudde/?utm_source=rss&utm_medium=rss&utm_campaign=omuwagizi-wessaza-lye-kyaggwe-omulala-afudde
