Gavumenti Ewadde ba Ssentebe B’amagombolola 27 Pikipiki e Wakiso

Bya Tonny Evans Ngabo

Minisitule ya gavumenti ez’ebitundu mu ggwanga ekakasizza nga bw’egenda okulowooza ku nsonga y’okwongera disitulikiti y’e Wakiso ensimbi okukira ku ndala olw’ekikula kyayo, emirimu egikolebwayo n’obungi bw’abantu abalimu. Kuno kwe kugattiddwa n’okukkiriza okusuumuusa eggombolola ya Wakiso Mumyuka etuuke ku mutendera gwa ttawuni kkanso. 

Kino kiddiridde ssentebe wa disitulikiti y’e Wakiso, Dr Matia Lwanga Bwanika okutegeeza omuwandiisi w’enkalakkalira mu minisitule eno Benjamin Kumumanya bw’abadde ku kitebe kya disitulikiti okukwasa ba ssentebe b’amaggombolola  27 entambula ya pikipiki zibayambeko  okukakkalabya emirimu gyabwe.

Bwanika ategeezezza ng’eggombolola eno eya Wakiso Mumyuka bwe yava edda ku ddaala lino nga disitulikiti yayisa  n’ekiteeso ku nsonga eno wabula ne gye buli eno tebawulira nga kanyego konna  okuva mu minisitule ku nsonga y’emu wadde nga kyetaagisa.

Bwabadde atuusa obubaka bwa Minisita wa gavumenti ez’ebitundu, Raphael Magyezi, omuwandiisi w’enkalakkalira mu minisitule ya gavumenti ez’ebitundu Benjamin Kumumanya agambye nti ensonga y’okusuumusa eggombolola ya Wakiso Mumyuka bagenda kugikwatako mu bwangu ddala wamu n’okuzuukusa enteekateeka gye baalina okulaba nga Wakiso nga disitulikiti bagiwa  obuwumbi bw’ensimbi 21 okukira ku disitulikiti endala ng’ekigendererwa kwe kulaba ng’efuna obusobozi obukola ku byetaago okusingira ddala enguudo eziri mu mbeera embi.

Minister Magyezi era mu bubaka bwe asabye ba ssentebe b’amagombolola abaweereddwa entambula zino okwongera amaanyi mu kulondoola pulogulaamu za gavumenti naddala Parish Development Modal (PDM) gy’agamba nti entuuka butereevu ku muntu asembayo.

Ate ye omubaka omukyala owa disitulikiti y’e Wakiso era nga ye Minisita ow’ekisiikirize atwala gavumenti ez’ebitundu Betty Ethel Naluyima agamba nti kyennyamiza nti ne wankubadde nga ssemateeka w’eggwanga awa obuyinza gavumenti ez’ebitundu okusolooza ensimbi n’okwekolera ku nsonga zaabwe,  naye minisitule y’eby’ensimbi ekyalemeddwa okuteekesa kino mu nkola nga disitulikiti zisooka kukuuta maviivi okuziddiza ensimbi, ekisse obuweereza bw’emirimu mu ggwanga.

Mu ngeri y’emu ba ssentebe b’amagombolola nga bakulembeddwamu meeya wa Kira Division, Gerald Kizito bagamba nti ne wankubadde nga gavumenti etandise okubalowoozaako naye basabye abakulu mu minisitule okubaliyirira ensimbi ze babaddenga bakozesa mu ntambula wamu n’okubayambako ku kitongole kya URA ekibabinika emagoba oluvannyuma lw’okulwawo okulaga enkozesa y’ensimbi ng’ate kino kiva ku gavumenti okulwawo okubawa ssente.

Related