Kabaka Awummuzza Ssekiboobo e Kyaggwe N’amusikiza Nnannyini Masomero ga Our Lady Vincent Matovu

Kabaka wa Buganda, Ronald Muwenda Mutebi II akoze enkyukakyuka mu baami abamulamulirako amasaza ag’enjawulo mw’asuulidde abamu n’abasikiza abaggya ate abalala ne basigalawo.

Mu bamu abasuuliddwa mwe muli Ssekiboobo atwala essaza ly’e Kyaggwe, Elijah Boogere Lubanga Mulembya ng’ono asikiziddwa abadde omwami w’eggombolola ya Mituba IV Kawuga, Vincent Matovu, ng’ono ye nannyini masomero ga Our Lady S.S e Namilyango ne Our Lady S.S Mukono erisangibwa e Ddandira mu kibuga Mukono.

Ssekiboobo asuuliddwa n’abamyukabe bonna ne babasikiza abapya nga bano kuliko; omumyuka asooka, Moses Ssenyonjo Kiyimba ng’ono y’abadde omukiise mu lukiiko lwa Buganda ng’akiikirira essaza ly’e Kyaggwe sso ng’ate omumyuka ow’okubiri ye Fred Katende.

Ye Ssenyonjo ye nannyini masomero okuli St. Mary’s College Lugazi, Mother Kevin College Mabira ne Anne Grace S.S e Nakifuma.

Abaami ab’amasaza abalala abasuuliddwa kuliko; David Nantagya ow’e Ssingo, Gabriel Kabonge ow’e Mawokota, Selastino Jackson Musisi ow’e Ggomba, James Ssempigga ow’e Bugerere, Gerald Kyanjo ow’e Buluuli, Mark Jingo Kaberenge II ow’e Busujju, Immaculate Nantaayi Kafeero ow’e Buweekula ne Muhammad Sserwadda ow’e Mawugola.

Mu bubakabwe bw’atadde ku mutimbagano gwa Whatsapp, Ssekiboobo awummudde Elijah Lubanga Mulembya yeeyanzizza Kabaka olw’okusiima n’amuwa okumulamulirako essaza lye lino ery’e Kyaggwe n’ayaniriza ne Ssekiboobo omuggya Vincent Matovu.

Obubaka bwa Ssekiboobo mu bujjuvu busomye bwe buti;

“Ntwala okuyozaayoza Omw. Vicent Matovu olwa Ssaabasajja Kabaka okusiima okumulonda ku bwami bw’e ssaza ly’e Kyaggwe. Nneebaza Ssaabasajja okumpa omukisa ne mpeereza ng’omwami ow’e ssaza ly’e Kyaggwe. Nneebaza ne Bannakyaggwe abanyambye ennyo nga ndi mu buweereza buno. Nneeyama okuweereza Kabaka wange obulamu bwange bwonna. Wangaala ayi Ssaabasajja.”

Related